विचारप्रवाह संग्रह

अॅलोपॅथीची आयुर्वेदाशी सांगड घालण्याची तसदी अनेकदा घेतली जात नाही, आणि त्याची किंमत रुग्णाला सोसावी लागते. तेंव्हा अशाप्रकारचे प्रशिक्षण हे डॉक्टरांच्या वैद्यकीय शिक्षणाचाच भाग असायला हवे असे मला वाटते.

स्वयंचलित यंत्रणेमुळे सरकारी कारभारात आलेली पारदर्शकता आणि खाजगी व्यवहारास प्राप्त झालेली गती विशेष उल्लेखनीय आहे. यंत्रप्रणालीची मदत आणि मुक्तस्पर्धा या माध्यमातून सहकार्याची प्रवृत्ती वृद्धिंगत होते.

आत्मविकास हेच भौतिक विकासामागील खरे साध्य आहे याची जाणीव ठेवावी. एक वर्ष, एक दशक संपत असताना आपणही सूर्याप्रमाणे नित्यनव्या तेजाने तळपावे हिच याप्रसंगी मी सदिच्छा व्यक्त करतो.

मनाची आणि मनातील स्मृतींची जागा निश्चित करावी. विश्वातील शरीरमनाच्या अस्तित्वाची मर्यादा लक्षात आल्यास सारे शरीरमन या विश्वाच्या जाणीवेत येते, जी अर्थातच चैतन्यदायी असते.

माणसाला आपले चित्त थाऱ्यावर ठेवायचे असेल, तर दिवसाला शिरस्ता असणे अगत्याचे आहे. नित्यनेमाने काही गोष्टी करत राहिल्यास चित्त जागेवर खिळून राहण्यास मदत होते. पर्यायाने आपणही कुठे दूर भरकटत न जाता स्थिर होतो.

एकाच विषयात एकाग्र झाल्याने गती मिळते, परंतु अनेक विषयांची सांगड घातल्याने प्रगती होते. चौकटीतील जग जगण्यासाठी एकाग्रता रहावी, तसे चौकटीबाहेरील जग पाहण्यासाठी चौकसता असावी.

आपण स्वतःला पाहतो, स्वतःबद्दल विचार करतो, पण स्वतःला विचार करताना पहात नाही. परिणामी आपले स्वतःच्या सापेक्षतेतून विश्व पाहणे होते, परंतु विश्वाच्या सापेक्षतेतून स्वतःला पाहणे होत नाही.